ธาตุวตฺถสงฺคห
นโม ตสฺส ภควโค อรหโต สมฺมาสมฺพุทฺธสฺส
ปณามคาถา
วนฺทิตฺวา สพฺพธาตญฺญุํ, ชินํ ธาตุสรีรกํ;
ปุพฺพกฺขรานํ กเมน, วกฺขํ ธาตฺวตฺถสงฺคหํ.
๑. สราทิกธาตฺวตฺถกณฺฑ
๑.
อโก ภู กุฏิลคเต, ภูจู’กิ คติลกฺขเณ;
อกฺโก จุ ถุติตาเปสุ, ภูสฺวา’กฺโข พฺยาปสํหเต.
๒.
อค’คฺคา วงฺกคเต ภู, อคิ ภู คมเน สิยา;
องฺโค จุ สงฺขยานงฺเกสุ, อโฆ จุ ปาปการิเย.
๓.
อคฺโฆ มูลฺเย ภฺว’ฆิ นินฺทา-, คตฺยารมฺภชเวสฺว’โจ;
อพฺยตฺตวากฺเย ภู อจิ, คตฺยพฺยตฺตกปูชเน.
๔.
อจุ ภู คตฺยพฺยตฺตเก, อจฺโจ ปูชาย ภูจุโร;
อญฺจ’ญฺจุ คติปูชาสุ, วิเสสเน จ ภูจุโร.
๕.
อฉิ อญฺโฉ จ ภฺวายาเม, อโช เขปคตีสุ ภู;
อชิ ทิตฺติยํ จุ อชฺโช, สงฺขาเร ภู ตุ ลพฺภเน.
๖.
อญฺโช จุ มกฺขนพฺยตฺติ-, คติมิสฺสนกนฺติสุ;
อญฺชุ ภู มิสฺสวชฺเชสุ, อโฏ ภู คติยํ สิยา.
๗.
อฏฺโฏ ภู วธาติกฺกเม, จุ ตฺว’ปฺปีภาวนาทเร;
อโฐ อฐิ จ คเต ภู, อโฑ สฺวา’พฺยาปิ ภู’ยฺยเม.
๘.
อฑิ อณฺฑตฺเถ ภู อฏฺโฏ, ภฺว’ภิโยคอติกฺกม-;
หึสาสมาธีสฺว’โณ ภู, สทฺทชฺฌเย ทิ ชีวเน.
๙.
อโต พนฺธนคมน-, สาตจฺจปาปเนสุ ภู;
ภฺว’ติ พนฺเธ จฺว’ตฺโถ ยาเจ, อโท ภู ภกฺขรกฺขเณ.
๑๐.
ภฺว’ทิ พนฺเธ ภฺว’ทฺโท คติ-, ยาจตาเฬ จุภู วเธ;
อนฺโธ จุ ทิฏฺฐิวินาเส, ภูทฺย’โน ปาณชีวเน.
๑๑.
อป’ปฺปา ตา ปาปุเณ’พิ, สทฺเท ภู อพฺพ คุมฺพน-;
หึสาคตีสฺว’มฺโพ สทฺท-, รกฺขสฺสาทคตีสุ ภู.
๑๒.
อพฺโภ คติยํ ภู อภิ-, สทฺเท อโม จุภู คติ-;
ปีฬาโรคภตฺติสทฺท-, โภชเนสฺวย ภู คเต.
๑๓.
อโร ภู คตินาเสสฺว-, รโห โยคฺยจฺจเน จุภู;
อโล ภูสนสมตฺถ-, นีวารพนฺธเนสุ ภู.
๑๔.
อลิ พนฺเธ ภฺว’โว รกฺข-, พฺยาปาลิงฺคปิหาคเต;
ติตฺติสามตฺถฺยปเวส-, สตฺตาสวนปตฺถเน.
๑๕.
อิจฺโฉปฺปเท วุทฺธิคาห-, กรณาวคเม วเธ;
ปีติโสภาสฺวิตฺเยกูน-, วีสตฺยตฺเถสุ ภู สิยา.
๑๖.
อโส ภู ภูคตฺยาทาน-, ทิตฺติเขปฺยทเน กิภู;
สฺวา ตุ สงฺฆาตพฺยาเปสุ, สฺวาสุ พฺยาเป ทิ เขปเน.
๑๗.
อหิ ภู คตฺยํ จุ ทิตฺยํ, อโฬ ภู อุคฺคเม สิยา;
อิโต ปรํ ตุ น วกฺขํ, ภูติ สุทฺธภุวาทิกํ.
๑๘.
อาฉิ อายาเม ภวติ, อาโณ ตุ ภูจุ เปสเน;
อาโป พฺยาปเน ภูสฺวาจุ, อาปุธาตุ จุ ลมฺพเน.
๑๙.
อาวาวทารเณ อาโส, วิชฺชมานุปเวสเน;
อิ คตฺยชฺฌยนิจิฉาสุ, สทฺทหเน จ วตฺตติ;
เย คตฺยตฺถา เต พุทฺธฺยตฺถา, ปวตฺติปาปุณตฺถกา.
๒๐.
อิกฺโข ทสฺสนงฺเกสฺวิขิ, ขิคิ คตฺยํ อิโจ ถเว;
อิชิ อิญฺโชกมฺเป อิโฏ, คเต อิณุ คเต ตโน.
๒๑.
อิติ พนฺเธ อิทิ ปร-, มิสฺสเร ภฺวิธ สิทฺธิยํ;
ทิ ตุ วุทฺธฺยํ อินฺโธ ชุตฺยํ, อิริโย ชีววุตฺติยํ.
๒๒.
อิโล ภู กมฺปนคติ-, สยเน ภูจุ เขปเน;
อิโส ภฺวนฺเวสิจฺฉาคตฺยํ, ที คตฺยํ กี ตฺวภิกฺขเณ.
๒๓.
อิสิฑิ วิมทฺเท อิสุ, อิจฺฉากนฺตีสุ อิสฺส ตุ;
อิสฺสายํ อิโฬ ถวเน, ปวตฺตติ จุราทิโก.
๒๔.
ภฺวีกนฺติพฺยาปิปชน-, เขปขาเท ทิภู คเต;
อีชีชิ คตินินฺทาสุ, อีโฑ ภูจุ ถเว สิยา.
๒๕.
อีที สนฺทีปเน จุโร, อีโร วจนกมฺปน-;
คติเขเปสุ ภูจุโร, วตฺตตีติ ปกาสิโต.
๒๖.
อีโส ทานคติอุญฺฉ-, หึสาทสฺสนอิสฺสเร;
อีโหสฺสาเห อีโฬ ถุตฺยํ, อุ สทฺเท อุกฺข เสจเน.
๒๗.
อุขูขิ คติยํ อุโจ, สมวายรเว ทิภู;
ทิ มิสฺเส อุจฺฉ พนฺธน-, นิฏฺฐาติกฺกมวชฺชเน.
๒๘.
อุโฉ ปิปาสายํ อุฉิ, อุญฺฉิมฺหิ อุชุ อชฺชเว;
อุชฺโฌ อุสฺสคฺเค อุฏฺโฐฺป-, ฆาตฺยุโท โมทกีฬเน.
๒๙.
อุทิ ตินฺตปสเว รุ-, ทฺโท มิตสฺสาทกีฬเน;
อุทฺรโภ ภกฺเข อุทฺธโส, กีจุ อุญฺเฉ จุ อุกฺขิเป.
๓๐.
อุโป อุปปตฺติยํ จุ, อุพฺโพ อุพฺพี จ หึสเน;
อุพฺภุภุมฺภา ปูเร อุโล, ทาหทานคเวสเน.
๓๑.
อุโส ภู วธรุชาสุ, ทาเห ตุ ภู คหาทิโก;
อุสฺสูโย โทสาวีกเร, อุโห ตกฺยุฬ สํหเต.
๓๒.
อูโช ชีวนพเล จุ, อูณุ อจฺฉาทเน สิยา;
อูโน จุ หานิยํ อูโย, อูยี จ ตนฺตุปนฺติยํ.
๓๓.
อูโส โรเค อูโห ตกฺเก, เอ คตฺยํ เอชกมฺปน-;
ทิตฺตีสฺเวโฐ วิพาธายํ, เอโธ ตุ ลาภวุทฺธิสุ.
๓๔.
เอรฑิ หึสายํ เอโส, คติเอสนวุทฺธิสุ;
เอสุ คตฺยํ โอโข โสส, ภูสาสมตฺถวารเณ.
๓๕.
โจฺวโช พลเตเช โอโณ, ปสาเร ภฺโวป นิฏฺฐุเภ;
ถปเน จุ โอปุชิ ตุ, วิลิมฺปฺโยมา สมตฺถเน.
๓๖.
โอลชิ เขเป โอลโฑ, โอลฑิ ภูจุ อุกฺขิเป;
โอโห จาเค อํโส ภาค-, สงฺฆาเตสุ จุราทิโก;
อํโห คเต ภู ทิตฺตฺยํ จุ, อิเม สราทิธาตโว.
อิติ ธาตฺวตฺถสงฺคเห สราทิกธาตฺวตฺถกณฺโฑ ปฐโม.
สตฺตจตฺตาลีสสตาเนกตฺถ ธาตโว.