๒. กการาทิกธาตฺวตฺถกณฺฑ
๓๗.
กโก โลลิจฺฉาคพฺเภสุ, กกิ โลเล คเตปิ จ;
กกฺกกกฺขขกขา หาเส, กขิ กงฺขิจฺฉสํสเย.
๓๘.
กโค กฺริยายํ กโจ ภู, รวพนฺเธ ทิจุภู ชุเต;
กจิ ทิตฺติพนฺเธ กชิ, รุเห กชฺโช ตุ ปีฬเน.
๓๙.
กโฏ คติวสฺสาวเร, กฏิ คตฺยํ กโฐ สุส-;
กิจฺฉชีวปาเก กฐิ, ภู โสเส ภูจุ อชฺฌเน.
๔๐.
กโฑ อทนทปฺเปสุ, กฑิ ภู หสเน จุ ตุ;
เฉทเภทนรกฺขาสุ, กฑฺโฑ ตุ กกฺกเส สิยา.
๔๑.
กฑฺโฒ อากฑฺเฒ กโณ ภู, คตฺยํ อฏฺฏสฺสเรปิ จ;
จุภู นิมีลเน กณฺโฑ, ปริจฺเฉเท จ เฉทเน.
๔๒.
กณฺฑุโว หึสากณฺฑูติ-, เฉททฺรเวสุ กณฺเณ จุ;
สวเน จ เภเท กติ, สุตฺตชนนเฉทเน.
๔๓.
กตฺตโร สิถิลตฺเต จุ, กตฺโถ สิลาฆเน กโถ;
หึสาปาเก ภู วากฺเย จุ, กสิ วงฺกมฺหิ วตฺตติ.
๔๔.
กโท ภู โรทนาวฺหาน-, มเท ทิ พฺยากุเล กทิ;
กนฺโท จ อมเท ภูจุ, กทฺโท กุจฺฉิตสทฺทเก.
๔๕.
กโน ทิตฺติกนฺติคเต, กนุยี สทฺทอทฺทน-;
ทุคฺคนฺเธ กโป ภู สตฺติ-, ทยาจฺฉาเท จุภู จเล.
๔๖.
กปิ ภู ตกฺกลคนฺธ-, หึสาสญฺจลสตฺติสุ;
จุ คตฺยํ กปฺโป ภู สตฺยํ, จุ ตกฺกวิธิเฉทเน.
๔๗.
กโพ วณฺเณ กพฺโพ ทปฺป-, คตีสุ กมุ ภู คเต;
ภูจฺวิจฺฉายํ อุปสคฺค-, ปุพฺพโก วิวิธตฺถโก.
๔๘.
กมฺโพ สํวรจลน-, คเต กโร ตภู กเร;
สฺวา วเธ กรฑิ เจว, กรณฺโฑปิ จ ภาชเน.
๔๙.
กโล ภู สทฺเท จุ เขป-, คตีสุ คณเน จุภู;
กลทิ โรทนาวฺหาเน, กลโป จฺววิยตฺติยํ.
๕๐.
กลโว ทิ ภเย โหติ, กลโก กุจฺฉเน สิยา;
กลิทิ โรทเน กลฺโล, อสทฺทสทฺทกูชเน.
๕๑.
กโว ถุติยํ กโส ตุ, วิเลขสทฺทหึสน-;
คตีสุ วิปุพฺโพ ผุลฺเล, กสิ วิทฺธํสยายเน.
๕๒.
กสี คติสุสฺสเนสุ, กสฺโส กฑฺฒฺยํ กโฬ มท-;
เสกกกฺกสฺเส กา สทฺเท, กาโถ จุ หึสเน สิยา.
๕๓.
กาโล จุ กาลสงฺขฺยาเน, มนฺตเน จาลเนปิ จ;
กาโส กุสทฺทปกาส-, สชฺชเน ภู ชุเต ทิภู.
๕๔.
กาสุ ทิตฺติโสภเนสุ, กิ ภู ญาณุนฺนตีสุ สฺวา;
วเธ กิจิ มทฺทเน จุ, กิโฏ ภาเย ภเย คเต.
๕๕.
กิโต โรคาปนยน-, ญาณิจฺฉาวาสสํสเย;
กิตฺตธาตุ จุ สํสทฺเท, กิโป จุ ทพฺพเล สิยา.
๕๖.
กิโร วิกฺเขปวิกิเร-, เนกตฺโถพฺยยปุพฺพโก;
กิโล ภู สุกฺกกีฬาสุ, นุเท จุราทิโก ภเว.
๕๗.
กิลมุ เขเท กิลิโท, ทฺยทฺเท กิลิทิ โรทเน;
กิลิโส ทิ อุปตาป-, มลิเน ภูกิ พาธเน.
๕๘.
กิโลโต อทฺเท กิวิ สฺวา-, วเธ กิโส ทิ ขียเน;
กี ทพฺพวินิมเย กี, กีโฏ จุ พนฺธรญฺชเน.
๕๙.
กีโล พนฺเธ กีโฬ กีเฬ, กุ สทฺทจฺฉาทปูรณ-;
หึสาฏฺฏสฺสรคนฺเธ ภู, กุจฺฉายํ ภู คหาทิโก.
๖๐.
กุโก อาทาเน กุโจ ตุ, อุจฺจสทฺทปฏิกฺกม-;
โกฏิลฺลโรธสํโยค-, เลขเนสุ ปวตฺตติ.
๖๑.
กุญฺโจ โกฏิลฺลปฺปคตฺย-, นาทเร กุจฺโฉ จุ นินฺทเน;
กุชิ สทฺเท กุชุ เถยฺเย, กุชฺโช อโธมุขีกาเร.
๖๒.
กุโฏ ภู เฉทปฺปวตฺต-, วกฺเก จุ ทาหาปฺปสาทเน;
กุฏิ เวกลฺเล กุฏฺโฏ จุ, เฉทกุจฺฉาปตาปเน.
๖๓.
กุฐิ เวกลฺลาลสิย-, โสเกสุ กุฑ ภกฺขณ-;
กีเฬ กุฑิ ภู เวกลฺล-, ทาเห จุ รกฺขเวธเน.
๖๔.
กุโณ ตภู สทฺเท ภู ตุ, โปสเน จุ ตุ มนฺตเน;
กุโถ ปูติสํกิเลเส, กุถิ หึสากิลิสฺสเน.
๖๕.
กุนฺโถ กี ทุกฺขาลิงฺคเน, กุโท ตุ กีฬเน กุทิ;
มิจฺฉาวากฺเย จุ กุทฺโท ตุ, กีเฬ กุโธ ทิ โกปเน.
๖๖.
กุโป ทิ โกเป จุ ชุติ-, ทุพฺพลฺเลฺย กุปิ วา กุพิ;
ภูจุ อจฺฉาเท กุมาโร, กุมาโลปิ จุ เกฬิยํ.
๖๗.
กุโร สทฺทอกฺโกเสสุ, กุโล สนฺตานสํวร-;
สงฺขฺยานพนฺธสงฺฆาต-, พนฺธูสุ จาติ เกจน.?
๖๘.
กุโส ภู โรทนาวฺหาน-, เฉทภูทานสญฺจย-;
ปูรณาจฺฉาทากฺโกเสสุ, ทฺยาลิงฺเค กี ปกาสเน.
๖๙.
กุสิ ภูจุ ชุตฺยํ กุสุ, ทิ ทิตฺติหรเณ กุโห;
วิมฺหาปเน จุ กุโฬ ตุ, ภกฺเข กู ภูกิ สทฺทเน.
๗๐.
กูโช หิกฺกเน กูโฏ จุ, ทาหปฺปสาทมนฺตน-;
อทานาปวาเท กูโฑ, ฆนีภาเว จ ภกฺขเณ.
๗๑.
กูโณ สงฺโกเจ จุ กูโป, ทุพฺพลตฺเต จุ กูล ตุ;
อาวเร เก สทฺเท เกโต, นิมนฺตเน จุราทิโก.
๗๒.
เกโป เกโล จ จลน-, คตฺยํ เกเล มมายเน;
เกโว เสวนเสเกสุ, โกฏฺโฏ ตุ ภูจุ เฉทเน.
อิติ ธาตฺวตฺถสงฺคเห กการาทิกธาตฺวตฺถกณฺโฑ ทุติโย.
ตึสสตาเนกตฺถ ธาตโว.