๓.๔.๔. วิภตฺยนฺตปจฺจย
๑๒๐๒.
ตุน ตฺวาน ตเว ตฺวา ตุํ, ธา โส ถา กฺขตฺตุ, เมว จ;
โต ถ ตฺร หิญฺจนํ หิหํ, ธิ ห หิ ธ ธุนา รหิฯ
๑๒๐๓.
ทานิ โวทาจนํ ทาชฺช, ถํ ตตฺตํ ชฺฌ ชฺชุ อาทโย;
สมาโส จา’พฺยยีภาโว, ยาเทโส จา’พฺยยํ ภเวติฯ
อิติ อพฺยยวคฺโคฯ
สามญฺญกณฺโฑ ตติโยฯ
อภิธานปฺปทีปิกา สมตฺตาฯ
นิคมน
๑.
สคฺคกณฺโฑ จ ภูกณฺโฑ, ตถา สามญฺญกณฺฑิติฯ
กณฺฑตฺตยานฺวิตา เอสา, อภิธานปฺปทีปิกาฯ
๒.
ติทิเว มหิยํ ภุชคาวสเถ,
สกลตฺถสมวฺหยทีปนิ’ยํ;
อิห โย กุสโล มติมา ส นโร,
ปฏุ โหติ มหามุนิโน วจเนฯ
๓.
ปรกฺกมภุโช นาม, ภูปาโล คุณภูสโนฯ
ลงฺกายมาสิ เตชสฺสี, ชยี เกสริวิกฺกโมฯ
๔.
วิภินฺนํ จิรํ ภิกฺขุสงฺฆํ นิกาย-
ตฺตยสฺมิญฺจ กาเรสิ สมฺมา สมคฺเค;
สเทหํ’ว นิจฺจาทโร ทีฆกาลํ,
มหคฺเฆหิ รกฺเขสิ โย ปจฺจเยหิฯ
๕.
เยน ลงฺกา วิหาเรหิ, คามา’รามปุรีหิ จ;
กิตฺติยา วิย สมฺพาธี-, กตา เขตฺเตหิ วาปิหิฯ
๖.
ยสฺสา’สาธารณํ ปตฺวา-, นุคฺคหํ สพฺพกามทํ;
อหมฺปิ คนฺถการตฺตํ, ปตฺโต วิพุธโคจรํฯ
๗.
การิเต เตน ปาสาท-, โคปุราทิวิภูสิเต;
สคฺคขณฺเฑ’ว ตตฺโตยา-, สยสฺมึ ปฏิพิมฺพิเตฯ
๘.
มหาเชตวนา’ขฺยมฺหิ, วิหาเร สาธุสมฺมเต;
สโรคามสมูหมฺหิ, วสตา สนฺตวุตฺตินาฯ
๙.
สทฺธมฺมฏฺฐิติกาเมน, โมคฺคลฺลาเนน ธีมตา;
เถเรน รจิตา เอสา, อภิธานปฺปทีปิกาติฯ
อภิธานปฺปทีปิกา ปริสมตฺตาฯ