นโม ตสฺส ภควโต อรหโต สมฺมาสมฺพุทฺธสฺส
อภิธานปฺปทีปิกา
พุทฺธปฺปณาโม
๑.
ตถาคโต โย กรุณากโร กโร,
ปยาต’โมสชฺช สุขปฺปทํ ปทํ;
อกา ปรตฺถํ กลิสมฺภวํ ภวํ,
นมามิ เกวลทุกฺกรํ กรํฯ
ธมฺมปฺปณาโม
๒.
อปูชยุํ ยํ มุนิกุญฺชรา ชรา-,
รุชาทิมุตฺตา ยหิมุตฺตเร ตเร;
ฐิตา ติวฏฺฏมฺพุนิธึ นรานรา,
ตรึสุ ตํ ธมฺมมฆปฺปหํ ปหํฯ
สงฺฆปฺปณาโม
๓.
คตํ มุนินฺโท’รสสูนุตํ นุตํ,
สุปุญฺญเขตฺตํ ภุวเนสุ ตํ สุตํ;
คณมฺปิ ปาณีกตสํวรํ วรํ,
สทา คุโณเฆน นิรนฺตร’นฺตรํฯ
ปฏิญฺญา
๔.
นามลิงฺเคสุ โกสลฺล-, มตฺถนิจฺฉยการณํ;
ยโต มหพฺพลํ พุทฺธ-, วจเน ปาฏวตฺถินํฯ
๕.
นามลิงฺคานฺยโต พุทฺธ-, ภาสิตสฺสา’รหานฺยหํ;
ทสฺสยนฺโต ปกาเสสฺส-, มภิธานปฺปทีปิกํฯ
ปริภาสา
๖.
ภิยฺโย รูปนฺตรา สาห-, จริเยน จ กตฺถจิฯ
กฺวจา’ หจฺจวิธาเนน, เญยฺยํ ถีปุนฺนปุํสกํฯ
๗.
อภินฺนลิงฺคานํ เยว, ทฺวนฺโท จ ลิงฺควาจกา;
คาถาปาทนฺตมชฺฌฏฺฐา, ปุพฺพํ ยนฺตฺยปเร ปรํฯ
๘.
ปุมิตฺถิยํ ปทํ ทฺวีสุ, สพฺพลิงฺเค จ ติสฺวิติฯ
อภิธานนฺตรารมฺเภ, เญยฺยํ ตฺว’นฺต มถาทิ จฯ
๙.
ภิยฺโย ปโยคมาคมฺม, โสคเต อาคเม กฺวจิฯ
นิฆณฺฑุยุตฺติญฺจานีย-, นามลิงฺคํ กถียตีติฯ